السلام عليكم
يقولك ربي خلق و فرق و عمر لي صبيعات اليدين يتشابهو..المهم الحمد لله على كل حال...
رانا في الصيف و السخانة تقتل و كاين لي يحوس و كاين لي يخدم كل واحد و كيفاه..
مالا نحكو على لي يحوس و يروح للبحر..حتى ليروح للبحر و تلقى اختلاف كاين تبحار الزوالي و تبحار مول الشكارة..و نبداو:
*ترونسبور:
الشيكور تلقاه رايح في الكيسات و برد الحال و الكليما داخل المهم نضمنلك بلي جانفي عندو داخل في طونوبيل و يلحق للبحر بردان و ما شكيتش يعوم..و حاجة ما خاصاتو يقلع على الرابعة تاع العشي و يجي مع ليل..و كي ينزل المقامة و خلاص ينزلو زوج مش مريقلين..مستفين..
و الزوالي مسكين تلقاه يبكر على 08 تاع صباح تقول رايح لواشنطن و يستنى في toyota coaster و 30 وجه معاه و سخانة و كي يلحق للبحر يلحق كي الجمرة كي يدخل للبحر ينشفو..و كي ينزلو تقول باغي يفكو الحصار على الفلوجة..
*السباحة:
الشيكور تلقاه كاري اتونت و باراصول مصور فيه التوريفال تشوفو مالبعيد..ماكلاه نحكي قاع الشمس ما توشيهش و هادي بومادا تاع شمس و هادي وسادة و فراشو باه يرقد المهم البحر يدخلو مرة و لا و زوج و يريح يقابل..الله غالب كاره من الما..و مع الكاميرا و فوتو نيميريك الله الله لي سوفونير تاع البلاد مع لحباب..
الزوالي ماكلاه تحكي تلقى هادوك 30 راس قاع حطو الباقاج تاعهم في بلاصة واحدة تقول والي راه مبني تما مالبعيد تشوفهم و كي يزدمو للبحر يزدمو يجرو داخل المهم يتوشي الما..و كي يدخل يسموه ما يخرجش حتى ينتفخ مليح مليح المهم حق ترونسبور لي خلصو يكملو في البحر..تبحيرة بحقها و خلاص كل دخلة للبحر يريح فيها ساعة و نص باه يجي خارج يرقد فوق الباقاج و تحت الشمس..تقول خالصة..
(نعتذر لعدم وجود الصورة المناسبة لمنع تصوير هذه الظواهر داخل الشواطيء..)
*الماكلة:
الشيكور ما يظل يجري و يطيب و مش عارف المهم هو يضمن هاديك ان ميليو لي غادي يصرفها في البحر و خلاص و ما يحوسش يفهم بزاف و تلقى كل الانواع قدامو هادي جاجة مكتفة و هادي pلا vاريي تاع حوت من كل الانواع المهم الكاينة و خلاص..
الزوالي يخي علابالكم و مازالكم حاصيين بلي من 08 و هو يجري علاجال هاديك تبحيرة ايا مسكين هو ينوض الوالدة باه تقليلو الفريت اوملات و حبات بيض مغليين على 07 تاع صباح يوجد في روحو زعما و يديرها في كاش باطة تاع زبدة كاملة و يقلع و كي يجي يفطر في البحر يلقاها قاع ذبالت من كثر لي 05 سوايع و هي تحت الشمس..
*وقت الروتور:
الشيكور عادي عندو كلش ساهل يروح لدوش يدوش ينحي الملح هداك و و يركب في الكيسات و يعطيها لدارهم و لا يدور في البلاج..
الزوالي حرب تصرا قبل ما يقلع مول toyota تلقاهم مدابزين على شكون يركب من القدام و يدير لا سانتير هاديك و تلقاهم يتهربو باه ما يركبوش في الكراسا تاع الوسط لي يقسمو الظهر المهم مول toyota تلقاه يحلف و يقول ما نزيدش نجيب هادي الجماعة خلاص..و زيد تلقاهم راكبين بيهم بالرملة بالملح تاعهم تلقى كل واحد يتلصق مع روحو من الملح كشفة و خلاص و لا كانت طريق بعيدة ها الواحد يدير حجرة على قلبو و يصبر و خلاص تقول تروح تمشي و ما تركبش معاهم...
المهم هادو غي شوية برك يصراو هاك و هاك قدام عيني و ان شاء الله ربي يفرجها على الزوالي و يولي يبحر هو تاني في الكيسات و يركبني معاه برك هههههههه..
نأتي للجزء المفضل عندي و لي نبغيه بزااااااااااااااااااااف..مساعدة لاصحاب الكوبي كولي:
*و الله يا المشوكي انت حاجة فور..انت حاجة كبيرة في بلاصة ضيقة ربي يخلينا مواضيعك..انت الكاينة انت..
*مشوكي شلونش و الله كل هذه الحرارة بس عندما قرات موضوعك حسيت بالبرودة..
*ايه ده ايه ده الله يخرب بيتك على الموضوع الجميل ده..
*شو ها الابضاي و شو ها الكلام لي زي العسل نطالب من الاشراف العزيز ترقية المشوكي لمشرف خاص..